李柱銘：「一定要反國安法」！

港平

「港區國安法」將至，李柱銘喺生果報又有篇文章，叫大家「一定要全力反對港版國安法」。

按照李柱銘嘅論述，「阿爺」訂立國安法有兩大目的，首先係「藉今次港版國安法確立先例，直接為港立法」，而且「凌駕所有特區法律」，「一下子便完全推翻了《基本法》的原有安排」，以致日後可為港「制訂和解釋更多惡法」；

而最大嘅目的，就係要喺香港「確立全面管治權」。李柱銘再推演落去，就話喺行政方面，中央喺特區政府架構上，加設咗國安公署呢個「太上皇機構」；喺立法方面要「奪取立法會獨有的立法權」；喺司法方面，國安公署嘅「管轄權」，日後都可能「變成奪取特區司法權的黑洞，甚至作『送中』安排」……

依家法律條文都未公佈，無謂多拗；但有啲常識問題，就好值得大家商榷一下。

一個國家維護自己嘅國家安全，美國如是、英國如是，「五眼聯盟」皆如是。

李柱銘以至攬炒派唔係成日講「國際標準」咩？！

另一個問題，有香港法律界人士就指出，「港區國安法」日後納入《基本法》附件三、喺香港正式實施之後，其實客觀效果，就係成為香港法律嘅一部分，，點樣可以「一下子推翻嗮」《基本法》嘅原有安排呢

呢條法律，除咗堵塞香港維護國安嘅漏洞之外，又改變咗啲乜呢？

李柱銘以至攬炒派依家講呢啲，係咪想趁住未有法律條文之前，不斷假設、想象，極盡能事喺港人心目中營造恐懼情緒啊？

以前反一地兩檢、反《逃犯條例》修訂都係呢招，依家又嚟？！